BAGUIO CITY – Simmuko iti tropa ti Northern Luzon Command (NOLCOM) ti Armed Forces of the Philippines ti maysa a personalidad a miembro ti rebelde a New People’s Army (NPA) ken dua a kameng ti People’s Militia wenno Milisyang Bayan iti rehion Cordillera.
Boluntaryo a simmuko ti maysa a medical officer ken underground organizer wenno recruiter ti Kilusang Larangang Gerilya MARCO, Ilocos-Cordillera Regional Committee idi kanikadua kadagiti kameng ti 54th Infantry Battalion ken Intelligence Units iti sidong ti Joint Task Force “TALA” ti Philippine Army.
Insuko ti nasao a personalidad ti paltogna nga M14 rifle ken iti agdama ket maipaspasidong iti custodial debriefing sadiay Calanan, Tabuk, Kalinga.
Boluntaryo met a simmuko da alyas Sagana, 24-anyos ken alyas EL, 20-anyos, agpada a baro, mannalon ken residente ti Malibang, Pudtol, Apayao idi rabii ti July 7 kadagiti kameng ti Pudtol Municipal Police Statiin ken 17th Infantry Battalion iti sidong ti Joint Task Force “TALA”.
Naamuan a dagiti dua ket naipasidongen iti custodial debriefing sadiay Pudtol, Apayao.
Agserserbi dagiti Milisyang Bayan a ‘part-time’ wenno ‘force multipliers’ dagiti rebelde nga NPA.
Ituloy met ti militar nga isakad ti local peace initiatives para iti panagsuko dagiti ad-adu pay a rebelde.
