BAGUIO CITY – Pimmusay ti maysa a doktor bayat a nadangran ti sangapulo ket uppat a dadduma pay iti panakadisgrasya ti naglugananda a van sadiay Tagum City, Davao del Norte itay agsapa.
Iti panakiuman ti Bombo Radyo kenni Rocky Aliping, board of director ti Benguet Electric Cooperative, manarimaan ti convention dagitoy iti nasao a lugar idi naipadamag kadakuada nga adda ti naaksidente a taga-Baguio iti nasao a lugar.
Kinunana a dagusda a nagturong iti ospital ken kinumpirmar dagiti doktor ti ipupusay ni Dra. Brigida Claro, dadaulo ti Internal Medicine ng Baguio General Hospital and Medical Center ken taga-Nangalisan, Tuba, Benguet.
Kinunana a nadangran met laeng ti dua pay a doktor ken ti sangapulo ket dua a nars, ken maysa kadagitoy ti adda iti kritikal a kasasaad.
Naamuan a nangisayangkat iti dua nga aldaw a Benchmarking ti nasao a Medical Team sadiay Davao ken Tagum.
Idi kalman ket nagturongda iti Southern Philippines Medical Center sadiay Davao tapnu agobserbar iti emergency procedures, ken dadduma pay a medical operations ken ita nga aldaw ket agturongda kuma iti Davao Regional Hospital sadiay Tagum idi napasamak ti aksidente.
Kabayatanna, iti report ti Bombo Radyo Davao ket agtultuloy ti imbestigasyon ti Tagum PNP iti napasamak nga aksidente sadiay Brgy Canocotan, Tagum City, Davao del Norte a nakairamanan ti Baguio Medical Team.
Segun iti nasao a kuerpo ti pulisya, napartak ti panagpataray ti driver a ni Jolan Balduwe iti van a nagluganan dagiti biktima.
Naamuan a ginandat daytoy ti ag-overtake iti maysa a bus ken pick up ngem nagduadua daytoy isut gapuna a naidungpar iti poste agingga a natumba ken natulid iti kalsada.
Naiturong dagiti biktima iti Medical Mission Group Hospital ngem naiyakarda iti Davao Regional Hospital.
Pimmusay iti insidente ni Dra. Brigida Claro bayat nadangran a da Dr. Virginia Mangati, 49 ken Dr. Eulina Lagdao, 50; dagiti nurses a da Marilyn Lapaz, 45; Nurse II Michelle Suyat, 42; Nurse II Candida Donggayao, 53; Carmen Bumatnong, 49; Teresa Abrenica, 44; Valorie Presco, 40; Allan Factora, 42; Jade Malicdan, 30; Lorraine Ramos, 31 ken Leah Serna, 31 no sadino, naamuan a sumagmamano kadagitoy ti head nurse.
Karaman pay kadagiti nadangran ni Clarence Clemente, 52 nga Admin Assistant ken ni Marites Baloran, 49, ti Computer Maintenance Technologist III (Head – MIS Section) ti BGHMC.
