BAGUIO CITY – Maisumitiren iti opisina ni Baguio City Mayor Benjamin Magalong ti memorandum mainaig iti panangpili ti PPP for the People Selection Committee iti proposals ti retailer a Robinsons para iti panakapasayaat ti Baguio City Public Market.
Iti interview ti Bombo Radyo Baguio kenni City Administrator Engr. Bonifacio Dela Peña, kinunana a kas chairman ti nasao a komite ket itedna amin a datus ken dokumento kenni Mayor Magalong.
Sigun kenkuana, addan iti mayor no aprobaranna wenno saan ti panakaipaay ti original proponent status (OPS) iti nasao a kompanya.
Innayonna nga adda ti posibilidad nga ibasura ni Mayor Magalong ti panakaipaay ti OPS iti nasao a kompanya.
Dinakamat pay ni Dela Peña nga iti baet a saan a nakaisumitir iti makidkiddaw a datus ken plano ti nangabak a kompanya ket daytoy pay ti napili.
Malaksid iti daytoy ket tinubngarna metlaeng dagiti sayangguseng nga adda ti napaboran ti panakapili ti maseknan a kompanya.
Impettengna a dimmalan iti proseso ti panagpili kas maibasar iti Ordinance No. 61 wenno ti People’s Innitiative no sadino, adda ti agserbi a selection committee.
Sigun pay kenkuana, iti kanito nga ibasura ni Mayor Magalong ti panakaipaay ti OPS iti Robinsons ket adda pay dagiti dadduma a wagas tapnu matungpal ti matartarigagayan a panakapabaro ti merkado publiko ti siudad.
