BAGUIO CITY – Linawlawagan ti dadaulo ti Commission on Higher Education (CHED) – Cordillera ti Regional Memorandum 113, series of 2021 nga impaulog ti opisinana itay laeng nabiit a makaaw-awat ita iti negatibo a reaksion.
Iti interview ti Bombo Radyo Baguio, inyunay-unay ni Dr. Demetrio Anduyan Jr. nga ipakpaka-ammo laeng ti nasao a memo kadagiti higher education institutions (HEIs) ti napagsaritaan iti taripnong ti Regional Task Force to End Local Communist Armed Conflict (RTF-ELCAC) idi September 22.
Impettengna nga iti nasao a memo ket saanda nga imbilin ken impilit ti panangikkat dagiti unibersidad ken kolehio iti rehion kadagiti ‘subversive’ materials iti library dagitoy.
Sigun kenkuana, iresrespetoda ti academic freedom dagiti dagiti pagadalan isut gapuna nga addan iti HEI no agtungpalda iti nasao a memo wenno saan.
Innayonna a gapu iti daytoy ket saanda nga inkabil iti udi ti memo a para daytoy iti ‘action or compliance’ ngem ketdi, inkabilda a para iti ‘information and guidance’.
Dinakamatna nga iti panakaawat ti CHED-CAR ket dagiti subversive materials ket dagiti nakasurat kas iti libro ken pamphlet a mangisursuro no kasano nga agaramid ti pampabettak.
Mabasa iti nasao a memo ti panangallukoy ti CHED-CAR kadagiti pagadalan iti rehion iti panakipaset dagitoy iti region-wide a panagikkat ti subversive materials kadagiti library ken online platforms ken iti panangipaima kadagitoy iti National Intelligence Coordinating Agency.
Maipalagip a tallo nga unibersidad iti pagilian, pakairamanan ti Kalinga State University ti nangikkat kadagiti libro ken dadduma a babasaen a maibilang a subversive materials manipud iti library dagitoy.
