BAGUIO CITY–Matamtaming iti pagagasan ti maysa a menor de edad a lalaki kalpasan nga aksidente a napaltogan daytoy ti padana a menor de edad a lalaki sadiay Mankayan, Benguet.
Ti suspek ket agtawen iti sangapulo ket maysa bayat a ti biktimana ket agtawen iti sangapulo ket uppat.
Iti imbestigasyon dagiti pulis, naamuan a nabangon ti biktima gapu iti dua nga uni ti naiputok a paltog.
Kalpasanna, nangngeg ti biktima ti panang-ayab kenkuana ti suspek tapnu apanna kitaen ti iggem daytoy a paltog.
Rimuar ti biktima ken napan nag-isbo ngem sinurot daytoy ti suspek ken sadiay nga impakita ken intutok ti suspek ti iggemna a paltog iti biktima.
Imbaga ti biktima nga isardeng ti suspek ti panangitutokna iti paltog kenkuana ken idi agawenna kuma ti paltog, aksidente a nakalbit ti suspek ti gatilyo.
Narikna ti biktima ti panagsayasay ti dara iti agong ken ngiwatna isut gapuna a dagus daytoy a timmaray ken nagkamang iti kaarubada.
Naitaray iti pagagasan ti biktima a nagsagrap ti tama ti bala ti paltog iti kanigid a pingpingna bayat a ti suspek ket naipaima iti social worker.
Naipaima met iti pulisya ti naaramat a paltog a maysa a caliber 38 a naglaon ti tallo a bala ken tallo a basyo ti bala.
