BAGUIO CITY – Pimmusay ti maysa a merchandiser a taga-Ifugao kalpasan a napalpaltogan daytoy iti deppaar ti NIA Road, Ambatali, Ramon, Isabela idi rabii.
Nabigbig daytoy a ni Oliver Duldulao, 36-anyos ken residente ti Santa Maria, Alfonso Lista, Ifugao.
Maibasar iti report, nakalugan ti biktima iti motorsiklona ken daldalyasatenna ti kalsada sadiay Barangay Ambatali idi pinalpaltogan daytoy ti riding-in-tandem iti agarup alas-siete idi rabii.
Natamaan ti likod ken takiag ni Duldulao a nagresulta iti ipupusayna.
Naamuan a nakaawiden iti pagtaenganda ti biktima ngem rimwar ken napan sadiay Ramon, Isabela kalpasan nga adda ti timmawag kenkuana.
Nagaramat dagiti suspek iti Caliber 45 a paltog.
Sigun iti pulisya, mangisaysayangkatdan ti follow-up investigation tapnu maamuan ti motibo iti panakapapatay ti biktima nangruna ta mapukpukaw ti cellphone daytoy a makatulong kuma iti imbestigasyon.
Nakasarita metten ti pulisya ti asawa ti biktima ken adda dagiti nadakamat nga impormasyon nga aramaten dagitoy a giya iti manarimaan nga imbestigasyon. (-via Bombo Radyo Cauayan)
