BAGUIO CITY – Nakemmeg ti maysa a merchandizer kalpasan a nagtakaw daytoy iti adu a shampoo iti uneg ti supermart iti kadakkelan a mall ditoy siudad ti Baguio idi kalman.
Nabigbig daytoy a ni Abraham Ngina Baguilod Jr., 26-anyos, awanan asawa, merchandizer ken residente ti Holy Ghost, Baguio City.
Maibasar iti report, immuneg ti suspek iti nasao a supermart ken nagturong iti ayan dagiti shampoo ken ditoy nga inkabilna iti back pack-na ti 16 a pidaso ti nagduduma a brand dagiti nginginaen a shampoo nga aggatad amin iti P3,000.
Kalpasanna ket nagala daytoy iti maysa a biskwit ken daytoy ti binayadanna iti counter ti supermart.
Nupay kasta, nasiputan ti gwardiya ti inaramid ti suspek isut gapuna a sinurotna daytoy ken rinikisana ti bag ti suspek a nangitunda iti panagrekoberda kadagiti shampoo nga inala ti suspek kalpasan nga awan ti naipakita daytoy a resibo.
Naiturong ti suspek iti istasyon ti pulisya ken ita ket sumangsango daytoy iti kaso a panagtakaw.
