BAGUIO CITY – Simmuko iti Tabuk City Police Station ti maysa a miembro ti Militia ng Bayan wenno supporter ti rebelde a New Peoples Army (NPA) sadiay Tabuk City, Kalinga.
Personal a nagturong ti 53-anyos a guerrilla member iti istasyon ti Tabuk City Police Station tapnu isuko ti bagina ken ti imetna a homemade short firearm a caliber 38 revolver a naglaon ti lima a bala.
Iti agdama, adda ti nasao nga indibidual iti kustodiya ti Tabuk City Police Station para iti custodial debriefing ken dadduma a proseso.
Impeksa met ni PLt.Col. Romulo Talay Jr., hepe ti Tabuk City Police Station ti panagyamanna iti panagsuko ti nasao a babai.
Innayonna a mabalin nga agnumar ti nasao a returnee iti Enhanced Comprehensive Localized Integration Program a naituding a para kadagiti sumuksuko a kameng ken supporter ti rebelde a grupo.
