Manarimaanen ti panagsanay dagiti miembro ti Philippine MuayThai National Team idiay pagilian a Thailand.
Iti exclusive interview ti Bombo Radyo Baguio kenni Salko “Boy Tisoy” Osmundo Velic, maysa kadagiti opisial a miembro ti Philippine MuayThai National Team, kinunana a nasayaat ti panagsanayda ken nawadwad ti suporta dagiti coaches kadakuada, ken patienna a maiyawidna ken dagiti kakaduana ti balitok a medalya.
Sigun iti 14-anyos nga yKalinga Muaythai fighter, kayatna a paneknekan a kabaelanna ti “sports” wenno ay-ayam a pinilina iti pannakipasetna iti international event ken kayatna nga agserbi kas “motivation” kadagiti kakaduana iti grupo a Tribu Banwar a naibangon idiay Kalinga.
Imbinglay ni Salko a ti panagensayo ket kasapulan a “consistent” ken inkapilitan tapno ad-adda a masanay ti bagi.
” Nu agtraining kami, nu adda ti laban mi ket dapat very consistent, dapat dire-diretso, pilitem a talaga.”
Salko “Boy Tisoy” Osmundo Velic
Para kenkuana, ad-adda a kayatna a mabannog ken mabugbug iti panagensayo ngem iti mabannog ken mabugbug iti uneg ti ring.
“Mas maymayat a mabannog ka ti ensayo kaysa mabannog ka idiay ring…[ken] mas maymayat nu mabugbug ka idiay ensayo kaysa mabugbug ka idiay ring.”
Salko “Boy Tisoy” Osmundo Velic
Manamnama a maipatungpal ti International Federation of Muaythai Associations (IFMA) World Youth Muaythai Championships inton Setiembre 11 agingga Setiembre 20 iti agdama a tawen iti nasao a pagilian.
Maibasar iti opisial a rekord ti nasao a Team, walo ti makisalip ken makibalubal a nagtaud manipod iti Pilipinas kontra kadagiti atleta nga agtaud iti dadduma a pagilian.
Kabayatanna, sakbay a nagbalin a miembro ni Salko iti Philippine MuayThai National Team, immuna a nakipaset pay dagitoy iti nagduduma a pasalip a naangay iti nagduduma a lugar kas iti siudad ti Baguio, Kalinga ken La Trinidad, Benguet nu sadino, dandani amin a nakipasetanna ket nakaiyawid ti balitok a medalya.
“Amin a limmabanak iti Baguio ket gold ti naalak”
Salko “Boy Tisoy” Osmundo Velic
Maipalagip a ni Salko ket maysa kadagiti “gadget dependent” sakbay a nagbalin nga atleta.
Tawen 2021 nagbalin nga scholar daytoy ken ditoy met a nasanay iti combative sports agingga a nakisalip iti local ken national podiums agingga a nadanunna ti naituding nga ay-ayam daytoy iti internasyonal.
Nabigbig pay daytoy kas kaunaan nga yKalinga combat sport athlete a nakipaset iti national team.
Iti agdama, naka-enrol ni Salko idiay Kalinga National High School ken paggidgidanenna ti panagiskwela ken kas maysa nga atleta.
