BAGUIO CITY – Agtultuloy ti pursuit operations nga isaysayangkat ti militar kontra kadagiti naglibas a rebelde a nakarinnupak dagitoy sadiay Abaka, Danggo, Tinoc, Ifugao idi parbangon.
Sigun kenni Lt. Col. Nicolas Quemado Jr., Commanding Officer ti 54th Infantry Battalion ti Philippine Army, nakarinnupak dagiti soldado ti agarup nasurok 30 a kameng ti New People’s Army-Nona del Rosario Command iti nasao a lugar ken nagpaut ti rinnupak iti 25 minutes.
Kinunana a nangitunda daytoy iti panakaduktal ti kampo dagiti rebelde nga addaan 38 a tolda ken panakakumpiskar dagiti dua nga M16A1 assault rifles, dua a 2-way radio, lima a bandoliers, dua a rifle grenades, walo a backpacks, maysa a pakete ti nagiling a marijuana, nagduduma nga electronic devices, medical paraphernalia, subversive documents ken personal belongings.
Impannakkelna nga awan ti nagbalin a casualty iti tropa ti goyerno bayat a mamatida nga adu dagiti casualties kadagiti rebelde gapu kadagiti nagkaiwara a sayasay ti dara iti nakapasamakan ti engkwentro.
Dinayawna met dagiti soldado kagiddan ti panangapalagipna kadagitoy iti kanayon a panag-alertoda bayat nga agtultuloy ti pursuit operations.
Naamuan a naka-awat iti impormasyon ti militar manipud iti maysa a maseknan nga umili mainaig iti panagkikil dagiti rebelde iti lugarda a mangituntunda iti buteng kadagitoy.
Iyap-apela pay ni Lt. Col. Quemado ti panagsuko laengen dagiti rebelde tapnu agnumarda iti Comprehensive Local Integration Program ti gobyerno.
