BAGUIO CITY – Ituloy latta ti Northern Luzon Command ti Armed Forces of the Philippines (AFP) ti kampanya kontra iti terorismo ken ituloyda ti panangisayangkatda kadagiti Law Enforcement Support Operations.
Impeksa daytoy ni Lt. Col. Isagani Nato, Public Information Officer ti AFP-Northern Luzon Command kasaruno ti napasamak manen nga engkwentro iti nagbaetan ti 24th Infantry Battalion, Philippine Army ken dagiti rebelde a New People’s Army iti sidong ti Kilusang Larangang Gerilya – North Abra.
Sigun kenkuana, mangisaysayangkat dagiti soldado iti combat operations sadiay Sallapadan Barrio, Sallapadan, Abra idi Sabado idi naka-engkwentroda dagiti nasao a rebelde.
Kinunana a nagpaut ti rinnupak iti lima a minutos ngem awan ti casualties iti tropa ti gobyerno bayat a mapapati nga adda ti casualties iti benneg dagiti rebelde.
Impasiguradona nga aramidenda ti amin tapnu magun-od ti panakaparmek ti insurhensia iti kabiitan a panawen.
Innayonna pay nga agtultuloy ti nairtengan a kampanyada kontra kadagiti rebelde tapnu mapilitan dagitoy a mangibbat iti armado a panakilaban ken isakkadda ti nakappia a wagas iti panakarisut dagiti kangrunaan a rason iti panagrebelde.
