BAGUIO CITY – Naispal ti maysa a minero kalpasan ti dua nga aldaw a panakapupok daytoy iti usokna sadiay Taktak 06, Antamok Mining Pit, Loacan, Itogon, Benguet.
Nabigbig daytoy a ni Gilber Po-ol Simon, 69-anyos, awanan asawa, tubo ken residente ti Purok 2, Loacan, Itogon.
Maibasar iti report, iti ala una ti malem idi Biyernes ket nagturong ni Simon iti usok daytoy sadiay Taktak 06, Antamok Mining Pit tapnu alaenna dagiti alikamenna.
Nupay kasta, narba ti nasao nga usok isut gapuna a napupok ti biktima iti uneg.
Nadiskobre laengen ti dua a kaannakanna ti insidente idi napanda biniruk ti biktima iti nasao nga usok iti alas siete ti agsapa idi kalman.
Babaen met iti tulong dagiti umili, minero ken opisyales ti Barangay Loacan Antamok ket sibibiag a naispal ti biktima iti alas nuebe kwarentay singko ti agsapa idi kalman.
Dagus nga intarayda ti biktima iti pagagasan nga ita ket agpapaimbag kalpasan a nakapasar iti dehydration.
