BAGUIO CITY – Malamlamayan ita ti maysa a minero a pimmusay kalpasan a nalmes iti maysa a swimming pool sadiay Level 1300, Poblacion, Itogon, Benguet idi kalman.
Nabigbig daytoy a ni Oswaldo Ubuan Bangsaliw, 39, single, tubo ti Cervantes, Ilocos Sur ken residente ti Upper Camp, Ampucao, Itogon, Benguet.
Maibasar iti imbestigasyon dagiti pulis, nagiinom ti biktima ken dagiti kakadwana kabayatan ti night swimming party dagitoy iti nasao a lugar.
Nagturong ti biktima iti pool agingga a nadlaw laengen dagiti kakadwana a saan daytoy nga aggargaraw.
Intaray daytoy ti Itogon Emergency ambulance iti Baguio General Hospital ngem naideklara a dead on arrival.
Maibagbaga met a naatake daytoy iti puso sakbay a natinnag iti swimming pool a nangitunda iti panakalmes daytoy.
