BAGUIO CITY – Malamlamayan ita ti maysa a minero a pimmusay kalpasan a natinnag iti usok, parikular iti level 300, Antamok Mines, Loacan, Itogon, Benguet idi agsapa kalman.
Nabigbig daytoy a ni Belly Santos Willy, 35, naasawaan ken residente ti Purok 2, Loacan, Itogon, Benguet.
Maibasar iti imbestigasyon, aksidente a natinnag ti biktima manipud iti level 300 agingga iti level 400.
Naamuan a naikadlis ti biktima ken natinnag iti sinking area nga addaan kauneg a nasurok kumurang 140 meters.
Nagtitinnulong dagiti kameng ti Itogon PNP, Fire, Health and Emergency Response Services (HEMS), Small Scale Miners ken dagiti maseknan a residente tapnu maispal ti biktima.
Narekoberda ti bagi ti biktima ngem kinumpirmar dagiti kameng ti HEMS a pimmusayen daytoy gapu iti nakaro a dunor iti ulo daytoy.
Inyawid met dagiti kakabagianna ti bangkay ti biktima iti balay dagitoy.
