BAGUIO CITY – Pimmusay ti maysa a minero kalpasan a natinnag iti uneg ti usok sadiay Luneta, Loacan, Itogon, Benguet idi kanikadua.
Nabigbig daytoy a ni Rene Bontiyek Degma, 27-anyos, minero a temporaryo nga agnanaed sadiay Camp 7, Baguio City ken tubo ti Besao, Mt. Province.
Sigun kenni PCI Eugene Raymundo, hepe ti Itogon PNP, simrek ti maysa a minero iti nasao nga usok tapnu ilukat ti blower dagitoy idi nakitana ti bangkay ti biktima.
Kinunana a ti biktima ket saan a minero iti nasao nga usok gaputa daytoy ket maysa nga intruder.
Innayonna a naduktalanda a simrek ti biktima iti nasao nga usok ngem saanna a nakita ti maysa pay nga abot a pababa nga addaan kauneg a lima a metro a nakatinnagan daytoy.
Mapapati a daytoy ti nangitunda iti panakatukkol ti tengnged ti biktima a rason ti ipupusay daytoy.
