BAGUIO CITY – Puntirya ti lokal a gobyerno ti La Trinidad, Benguet ti panakaiyamid ti maysa a mini eco-park iti uneg ti Puguis Communal Forest sadiay sakbay ti ngudo ti agdama a tawen.
Iyusuat ti lokal a gobyerno ti La Trinidad ti proyekto ken namnamaenda a marugian inton Disyembre nga addaan ti inisyal a pondo a P500,000, partikular iti konstruksion ti tree top walk ken manmade cave.
Kinuna ni Mayor Romeo Salda a ti proyekto ket paset ti partnership-da iti DENR para iti panakaipreserba ti communal forest ken pagtaudan pay ti pamastrekan ti lokal a gobyerno ti ili ken pagbiagan dagiti umili sadiay.
Apaman a mailukat ti eco-park iti publiko ket nainget a maiwanawan dagiti sangaili a sumrek sadiay.
Innayonna pay a mapunpuntirya ti panagbalin ti communal forest kas training ground ti Philippine National Police.
