BAGUIO CITY – Nailukat iti publiko ti maysa a miniature Christmas village a nakaitampokan dagiti nagduduma a parang seknan iti Paskua iti uneg ti maysa a mall iti deppaar ti Session Road, Baguio City.
Sigun kada City Tourism Officer Engineer Alec Mapalo ken Diocese of Baguio Bishop Victor Bendico, babaen iti parang ket mapalagipan dagiti umili a nasken a saan a mapukaw ti espiritu ti Paskua iti baet ti agdama a pandemya.
Sigun pay kadakuada, makatulong pay daytoy a paglinglingayan dagiti umili ita a panawen.
Kinuna met ti kolektor dagiti naaramat a miniature Christmas figurines a ni Lee Majors Fajilan a nasurok 500 a figurines ti naiparang iti nasao a miniature Christmas village.
Dinakamatna nga ideyada a sangkapamilya ti panangibinglayda met kadagiti koleksionda iti publiko tapnu pagtaudan ti ragsak dagiti makabuya kadagitoy ita a panawen ti Paskua.
