BAGUIO CITY – Pimmusay ti maysa nga ina bayat a maob-obserbaran iti pagagasan ti dua a kapamilyana iti ospital kalpasan ti maatap a panakalmes dagitoy iti baybay sadiay Bacnotan, La Union.
Nabigbig ti pimmusay a ni Imelda Calgo, 53-anyos, residente ti Camp 8, Baguio City.
Sigun iti Bacnotan Municipal Police Station, aglanglangoy dagiti biktima idi mapapati nga inguyod dagitoy dagiti dadakkel a dalluyon paturong iti nauneg a paset ti baybay.
Dagus a nagresponde dagiti kabagianda ngem awanen ti puot ni Calgo idi naiyaon daytoy.
Naitaray dagiti biktima iti ospital ngem deklara a dead on arrival ni Calgo.
Agtaltalinaed met iti Ilocos Training Regional and Medical Center ni Mariline Sales, 45-anyos bayat a kritikal iti Intensive Care Unit ti kapada nga ospital ni Maritoni Sales, 11-anyos.
Manamnama a maibiahe paawid iti Baguio City ti bangkay ti pimmusay nga ina. (with Bombo Radyo La Union)
