BAGUIO CITY – ‘I love the Philippines.’ Daytoy ti nagbalin a waragawag ti kandidata ti Miss Colombia iti ambush interview kenkuana ti Bombo Radyo news team iti panagsangbayda ditoy siudad ti Baguio.
Iti baet ti nainget a seguridad ket nakabirok iti gundaway ti Bombo Radyo News Team tapnu makauman ni Miss Colombia Andrea Tovar.
Segun iti beauty queen, maragragsakan daytoy iti tunggal kanito ti panagtalinaedna ditoy pagilian ken mapaam-amanga daytoy iti nabara a panangsarabo kadakuada dagiti Pilipino.
“I love the Philippines. I enjoy everytime and every moment. Its amazing…” Ti statement ni Miss Colombia.
Immuna iti daytoy, nagbalin a nabara ti panangpasangbay dagiti opisyales ti Baguio City ken ti Hotel and Restaurant Association of Baguio wenno HRAB kadagiti kandidata ti Miss Universe iti isasangpetda iti Loakan Airport.
Kabayatanna, kinuna met ni reigning Miss Universe Pia Wurtzbach iti ambush interview kenkuana a magagaran daytoy iti isasangbayna ditoy siudad ti Baguio ken naragsakan daytoy iti umuna a gundaway a panangbuyana iti silent drill dagiti PMA cadets.
