--Ads--

BAGUIO CITY-Maipatungpal ti ‘no fly zone’ iti masakopan ti Loakan Airport iti panagsangbay dagiti kandidata ti Miss Universe ditoy siudad inton Enero 18.
Sigun iti Baguio City Police Office, maipatungpal ti ‘no fly zone’ manipud alas sais ti agsapa agingga iti alas dies ti agsapa.
Kinuna ti BCPO a nakikoordinarda metten iti Civil Aviation Authority of the Philippines (CAAP) para iti panakaipawil ti panagpatayab iti eroplano wenno anyaman nga aircraft iti masakopan ti Loakan Airport.
Malaksid iti daytoy ket maipawil met laeng ti panagpatayab iti camera drones ken asinoman nga aglabsing ket makumpiskar kadakuada ti nasao a banag.
Mainaig iti daytoy, immapela ti pulisya iti kooperasyon ti publiko, agramanen dagiti kameng ti media, iti panangipatungpal dagitoy iti random inspection.
Manamnama a sumangpet ditoy siudad dagiti kandidata ti pasalip inton mierkules iti sumaruno a lawas, iti pasado alas otso ti agsapa.