BAGUIO CITY – Agtultuloy ti imbestigasion nga ipatpatungpal ti Abra Police Provincial Office para iti pakabigbigan ti suspek iti pannakapapatay ti maatap a drug personality sadiay Bangued, Abra idi kalman.
Nabigbig ti biktima a ni Kim Aberilla Millare, 32-anyos, naasawaan, ken tubo ti Lingtan, Bangued Abra ken agnanaed sadiay Pidigan, Abra.
Maibasar iti imbestigasion, bayat nga imanmaneho ti biktima ti motorsiklo daytoy kalpasan nga intulodna ti asawana a mannursuro iti Bernos National High School ket pinaltugan daytoy ti saan pay a nabigbig a suspek.
Naiturong ti biktima iti Abra Provincial Hospital ngem naideklara a dead in arrival
Narekober dagiti otoridad iti bulsa ti biktima ti innem a pakete a naglaon iti maatap a shabu, maysa a selpon, headset ken dadduma pay.
Narekober pay iti crime scene ti dua a basyo ti caliber 45 a paltog.
