BAGUIO CITY – Agtultuloy ti panangipaay ti serbisyo ti Mobile Vaccination (Movacc) Team ti City Health Services Office ti Baguio kadagiti bedridden, senior citizens ken persons with disability (PWDs) a saan a makapan a mismo kadagiti vaccination sites ti siudad.
Sigun kenni City Health Services Officer Dr. Rowena Galpo, dumanonen iti 53 manipud kadagiti 197 a nakalista iti masterlist dagiti nasao nga indibidual ti nabakunaanen ti Movacc Team kontra iti COVID-19.
Kinunana nga immuna a naisayangkat ti pre-registration tapnu maituding ti Movacc Team ti panagsarungkarda iti balay dagiti benipisaryo.
Kinuna met ni Dr. Khecy Manuel-Colas, dadaulo ti Movacc Team a mabalin latta a maiparehistro dagiti senior citizens, PWDs ken bedridden individuals kadagiti barangay health centers.
Immuna a naiyusuat ti Movacc Team idi May 20 a bukbuklen ti maysa a doktor, screener, counselor, vaccinator ken driver ti naka-standby nga ambulance.
Paset daytoy ti kampanya ti Baguio tapnu malabanan ti COVID-19.
