Naitantan ti mock elections a naituding a mapasamak sadiay Bontoc ken Sagada Mt. Province inton January 18 kasta met kadagiti daduma pay a paset iti pagilian.
Kasaruno dayta ti impaiyulog ti Korte Suprema a Temporary Restraining Order iti Commission on Elections.
Daytoy ket mainaig iti panakadiskwalipikar ni Caloocan City representative Edgar Erice ken daduma pay nga agngayangay para iti umadanin a National ken Local Elections iton bulan iti Mayo.
Iti panakiuman iti Bombo Radyo Atty.John Paul Martin, Election Officer iti Commission on Elections-Baguio, kinunana a sigun iti Korte Suprema, nasken a mairaman latta ti nagan ni Erice ken dagiti daduma pay a diniskwalipkar ti Commission on Elections gapu iti panakideklarada kas nuisance candidate.
Gapu iti dayta, dumanon iti agarop Php132 million ti nasayang gapu ta saanen maaramat pay dagiti naimprinta nga agarop 6 million a balota.
Malaksid iti dayta, back to zero ita ti Commission on Elections gapu iti kamali a panakaimprinta dagiti balota.
Nupay kasta, naipanamnama met nga addaan pay iti nawadwad a panawen ti Commission on Elections para iti panangimprenta dagitoy kadagiti balota.
Kabayatanna,imbinglay ni Atty. Martin nga awan iti nadiskwalipikar nga agngayangay iti Baguio City gapu iti panakaideklara dagitoy kas nuisance candidate.//Bombo Mera Pacpacan
