BAGUIO CITY – Agtultuloy latta ti panangwanawan ti Itogon Municipal Police Station kadagiti nagduduma nga usok sadiay tapnu matiliw dagiti mangipatpatungpal iti iligal a panagminas.
Sigun kenni Police Major Rommel Sawatang, hepe ti Itogon PNP, awan paylaeng ti nakemmegda nga indibidual wenno grupo nga iligal nga agminminas sadiay.
Kinunana a maysa a bambantayanda ket dagiti arigna ‘paniki’ wenno dagiti minero a maatap nga agbungbungbong kadagiti usok babaen iti dadduma nga authorized companies nga agminminas sadiay.
Innayonna nga agtultuloy metlaeng ti kooperasyonda iti Loacan Itogon Pocket Miners Association gaputa nagkiddaw iti seguridad ti asosasyon.
Maipalagip a ti LIPMA ket napalubusannen ken otorisado nga agminas kalpasan iti pamalubos ti Department of Environmnet and Natural Resources, Provincial Mining Regulatory Board, ken Mines and Geosciences Bureau idi napalabas a bulan.
