BAGUIO CITY – Saan a naapektaran ti moral ti kapulisan ditoy rehion Cordillera mainaig iti nabara nga isyu iti alegasyon kontra iti maysa a pulis a nairaman iti Tokhang for Ransom iti maysa a negosyante a Koreano.
Sigun kenni PSupt. Marcelo Polig, panakangiwat ti Police Regional Office-Cordillera, ti panakairaman ti nasao a pulis ket tuldok laeng nu idillig iti nasurok 120,000 a bilang dagiti pulis iti pagilian.
Kinunana nga agtalek met daytoy a saan a dimmanon iti panunut dagiti pulis ditoy Cordillera ti panagaramatda iti anyaman a police operation tapno makaala iti kwarta.
Agtaltalinaed met ti panagtalek dagitoy kenni PNP Chief Ronald “Bato” Dela Rosa iti baet dagiti pammabalaw kontra kenkuana ken iti panagkiddaw ni House Speaker Pantaleon Alvares nga aglusulus daytoy iti pwesto.
Innayonna pay nga agtultuloy latta ti panagaramid dagitoy iti rinugianda a programa ti PNP chief gaputa mamati dagitoy a nadagdagsen ti programa daytoy nu idillig iti nasao nga alegasyon.
