Rinaut ti Ukriane ti Moscow, Russia babaen iti panagaramatda kadagiti drones iti maikadua nga agsasaruno a rabii.
Gapu iti daytoy, temporario a napasardeng ti uppat a kangrunaan nga airport iti kabesera ti Russia ken kanayunan pay a siam iti sabali met a lugar–bayat nga agsagsagana ti Russia a mangsangaili iti “major military parade” a manamnama a tabunuan dagiti lider ti lubong a pakairamanan ni Xi Jinping ti China.
Sigun kenni Moscow Mayor Sergey Sobyanin, agarup sangapulo ket siam ti nadadael nga Ukrainian drones, maysa a rabii kalpasan a pinalpaltugan ti Russian air defense ti uppat a drones nga asideg iti siudad ti Russia.
Awan met ti naipadamag a serioso a pannakadadael wenno pimmusay.
Dagiti “devices” a naiyuswat idiay Moscow ket karaman kadagiti 105 a drone ti Ukriane a na-intercept iti intero a Russia iti maysa a rabii, sigun iti defence ministry idi kalman.
Ti kaudian a panagatake ti Ukraine iti kabisera ti Russia ket mapapati a gapu iti manamnama a panagbisita ni Xi Jinping idiay Moscow para iti tallo nga aldaw nga “state visit” daytoy.
