Binabalaw ni Senador Risa Hontiveros ti mosion ni Kingdom of Jesus Christ (KOJC) leader Apollo Quiboloy a maipasidong daytoy iti “hospital arrest” idiay Davao City.
Sigun kenni Hontiveros, serioso ti krimen a human trafficking, panagrames, ken panangabuso kadagiti ubbing a sangsanguen ni Apollo Quiboloy, isut gapuna a kasapulan a patas ti panangibilang kadagiti akusado, aniaman ti lebelda iti biag ken koneksion dagitoy.
Impaganetget ti nasao nga opisial a rumbeng nga awan ti “special treatment” kenni Quiboloy.
Kinuna pay ti nasao nga opisial nga “entitled” unay ni Quiboloy ken patienna nga awan iti lugar ti panangdawatna ti “hospital arrest” idiay Davao.
Maipalagip nga impablaak idi kalman ni Police Colonel Jean Fajardo, pannakangiwat ti Philippine National Police (PNP) a nangipila ti mosion ti kampo ni Quiboloy iti Pasig City Regional Trial Court (RTC) Branch 159 para iti “hospital arrest” ni Quiboloy ken maysa kadagiti akusado a ni Ingrid Canada.
Sigun kenni Police Colonel Jean Fajardo, adda ti “existing medical condition” wenno marikrikna a sakit dagiti dua nga indibidual isut rason a kayatda a maiyakar dagitoy iti Veterans Memorial Medical Center idiay Davao City.
Kabayatanna, impapilit ni Hontiveros a kasapulan a saan a makapili ni Quiboloy nu sadinno ti rumbeng a pakaibaludanna.
Dinakamat ni Hontiveros nga awan ni Quiboloy iti uneg ti aw-awaganda a “King Dome,” isunga saan nga agtignay daytoy a kaasping ti Dios.
