BAGUIO CITY – Nakailista ti Barangay Guisad Central iti 30 a kaso ti dengue manipod Enero agingga idi napalabas a bulan.
Inaklon ni Punong Barangay Marion Bundad iti interview ti Bombo Radyo Baguio a maysa dagitoy kadagiti nakailista iti kangatoan a kaso ti dengue iti siudad.
Sigun kenkuana nakarekober met itan dagiti nasao nga indibidual manipod iti sakit ken awan ti aktibo a kasoda iti dengue sadiay.
Kinunana a nangat-ngato daytoy nu idilig iti maysa a kaso a nailistada idi napan a tawen wenno kabayatan ti pannakaipatungpal ti Enhanced Community Quarantine iti pagilian.
Gapu iti daytoy, kanayunan met ti panangpalagipda ken panangballakadna kadagiti residente iti masakopanna a barangay gapu iti nangato a kaso dagitoy iti dengue.
Kabayatanna, guyguyuguyenna pay dagiti residente sadiay a makipaset iti Mosquito Challenge ti masakaponna a barangay nu sadinno ipaayanna iti gungguna dagiti residente a makatiliw iti lamok nga addaan iti dengue.//cgd
