![](https://img.bomboradyo.com/baguio/2019/10/mother-tongue.jpg)
BAGUIO CITY – Agtaltalinaed a karit iti Department of Education (DepEd) ti komunikasyon dagiti mannursuro ken dagiti estudyante dagitoy iti mother tongue-based a wagas ti panagisuro kadagiti pagadalan ditoy siyudad ti Baguio.
Sigun kenni Soraya Faculo, Assistant Schools Division Superintendent ti DepEd-Baguio Division, agtultulloy ti ar-aramidenda a panagadal ken panangipaay ti remedyo iti nasao a karit.
Kinunana a kabinnadang ti DepEd-Baguio dagiti linguists wenno dagiti eksperto iti lingua franca wenno dayalekto iti panangbirukda iti solusyon iti nasao a pakaseknan.
Innayonna a kabinnadangda pay ti council of elders a bukbuklen dagiti panakabagi dagiti tribu a kan-kanaey, ibaloy ken kalanguya.
Sigun kenkuana, napateg met ti akem dagiti nagannak iti panakaisuro ken panakasanay dagiti ubbing iti mother tongue wenno nainsigudan a panagsao tapnu saan dagitoy a marigatan iti pagadalan.
Maibasar iti datus ti DepEd-Baguio, kadawyan a Filipino ken Iloko ti maar-aramat a wagas ti panagsuro kadagiti pagadalan ti elementarya ken sekondarya ditoy siudad.