BAGUIO CITY–Dukduktalen paylaeng ti Abra PNP no adda ti pakainaiganna iti umadani a barangay election ti napasamak a panakapalpaltog ti agsawa a kapitan ken first kagawad ti Barangay Immuli sadiay Pidigan, Abra idi kanikadua.
Sigun kenni PSI Grace Marron, information officer ti Abra PNP, paset daytoy ti pangimbestigar ti pulisya iti motibo ti nasao a panagpalpaltog kada First Barangay Kagawad Victor Dela Cruz Pisco ken Punong Barangay Elida Sales Pisco a nakairamanan ti kabsat ti kagawad a nabigbig a ni Myrna Pisco-Vasquez.
Kinunana a kitkitaenda amin a posible nga anggulo iti nasao a krimen.
Naamuan a nabukelen ti ‘Task Force Pisco’ a mangimbestigar iti nasao a krimen. Naamuan pay nga addaan panggep nga agpila iti ceritificate of candidacy ti nasao a kagawad para iti kinakapitan ti barangay dagitoy.
Maipalagip nga iti imbestigasyon ket naamuan a nakalugan dagiti biktima iti maysa nga elf truck ken dumaldalyasat ti lugan iti Pidigan-Pilar Provincial Road paturong sadiay Barangay Immuli idi adda ti nag-overtake a motorsiklo a mapapati a nangpalpaltog kadagiti biktima.
Dagus a naitaray iti pagagasan dagiti tallo ngem naideklara a dead on arrival ni Kagawad Pisco bayat a maob-obserbaran ti asawa ken kabsatna.
Innayonna pay nga iti agdama ket nainget met ti seguridad nga ipatpatungpalda iti nasao a pribinsya.
Sigun kenkuana, agtultuloy ti implementasyon ti gun ban ken PNP-COMELEC checkpoints iti masakupan ti probinsia nangruna ta dinakamat ti Cordillera PNP a maysa ti Abra iti tutukanda iti umadani a panagbobotos.
