BAGUIO CITY – Imbasura manen ti First Judicial Region, Fourth Branch, Municipal Trial Court in Cities ti Baguio City ti impila ti lokal a gobierno ti Baguio a motion for reconsideration kontra iti maysa a pribado a koorporasyon iti maatap a panangsabidongda iti 45 a pine tree sadiay Legarda Road.
Nakalanad iti desisyon ti korte a kurang dagiti ebedensiya nga imparang ti lokal a gobierno kontra iti nasao a koorporasyon.
Nailanad pay a saan metlaeng a maiyannatop iti environmental code dagiti kaso nga impila ti lokal a gobierno kontra iti kadagitoy.
Immunanan a naduktalan ti Baguio LGU ti maatap a panagsabidong ti nasao a koorporasyon kadagiti 45 a pine trees sadiay idi 2019.
Gapu iti daytoy, nangipila ti siudad ti kaso a panaglabsing iti environmental code kontra iti koorporasyon ngem immunan a nadismiss.
Agingga ita ket awan paylaeng ti komento ni Baguio City Mayor Benjamin Magalong seknan iti nasao nga isyu.
