BAGUIO CITY – Naiyusuat ti Motorcycle Response Team ti Baguio City Police Office – City Public Safety Company sadiay Athletic Bowl idi kalman.
Sigun kenni BCPO-Acting City Director PSSupt. Ramil Saculles, nabukel ti nasao a konsepto kas maiyanatup iti sitwasyon ti trapiko ditoy siudad gaputa nalaklaka dagitoy a makalusot no adda man ti marespondean.
Kinunana nga iti sitwasyon ti trapiko ditoy siudad ket naparpartak a makaresponde dagiti motorsiklo no idilig iti mobil ti kapulisan nangruna kadagiti lugar nga adayo iti Central Business District.
Innayonna a no mabannog ti Motorcycle Response Team nga agrikrikus iti nagduduma a paset ti siudad ket agsublida iti naituding nga staging area tapnu agserbida a kanayonan a pwersa ti pulisya.
Bukbuklen ti dua a shift para iti agsapa ken rabii ti nasao a response team ken tunggal shift ket addaan iti 14 a miyembro nga agbalin a riding-in-tandem para iti maysa a motorsiklo.
Naamuan met a ti pito a kabarbaro a motorsiklo ket impaay ti Police Regional Office-Cordillera.
