BAGUIO CITY – Natalgeden ti kasaad ti motorcycle rider a nadangran iti aksidente iti interseksion sadiay Lower Session-Mabini, Baguio City alas otso idi rabii kalman.
Nabigbig daytoy a ni Emerson Apichor Patang, 32-anyos ken residente ti San, Luis, Baguio City.
Maibasar iti report ti pulisya, nagtaud ti motorsiklo iti Upper Mabini ken pasalog daytoy iti Harrison Road idi aksidente a nakadinnungparna ti maysa a taxi nga nataud met iti Lower Session Road paturong iti Upper Session.
Nagresulta daytoy iti panakadadael ti motorsiklo ken sumagmamano a paset ti taxi.
Dagus a naiturong iti BGHMC ti motorcycle rider kalpasan a nagsagrap daytoy iti minor injury ngem dagus metlaeng a napaawid kalpasan a nataming.
Narisut met ti nasao nga insidente kalpasan a nagtunos dagiti dua a partido no kasanoda a tarimaanen ti nadadael a paset ti behikulo dagitoy.
