TUBA BENGUET- Agtultuloy latta ti panagpakdaar dagiti otoridad manipud Tuba Municipal Police Station kadagiti motorista tapno agannad partikular tatta a mapaspasaranen ti panagtutudo.
Iti pannakiuman ti Bombo Radyo kenni Police Corporal Jayrald W. Aleo manipud iti nasao nga stasyon, kinuna a kanayon latta dagitoy nga agit-ited iti advisory kadagiti iti publiko tapno maliklikan ti aniaman nga insidente.
Nagballaag pay daytoy iti publiko nga agannad bayat a magnada iti paset ti Kennon Road agsipud ta saan latta maliklikan ti panagtennag dagiti bato karkaro no napigsa ti tudo.
Gapu iti daytoy, impettengna a mas nasaysayaat a pagnaan iti Marcos Highway bayat iti panagtutudo agsipud ta mas nataltalged a pagnaan daytoy.
Nupay kasta, kasapulan latta ti naan-anay a panagannad agsipud ta nagalis dagiti kalsada.
Kabayatanna, maiyu-unay iti publiko partikular dagiti motorista nga agbalin nga alerto partikular no pagtutudo karkaro iti rabii kenno mabalbalin liklikan ti agbyahe bayat a napigsa ti tudo iti rabii ken iti metlaeng aldaw.
Innayon met ni Police Corporal Aleo a silulukat latta ti opisina dagitoy no adda dagiti agkasapulan iti tulong partikular iti aniaman nga insidente.//Bombo Rosemarie Bulsao
