BAGUIO CITY – Balballaagan ti pulisya sadiay La Trinidad, Benguet dagiti indibidual nga agpampamarang nga empleado ti gobierno tapnu laeng makadalan kadagiti quarantine checkpoints ditoy lokalidad.
Kasaruno daytoy ti panangkumpiskarda iti siyam a peke a placards ti Department of Public Works and Highways manipod kadagiti nagduduma a drivers a nagpammarang nga empleado ti ahensia tapnu laeng makalusotda iti checkpoint sadiay Longlong, Puguis idi laeng nabiit.
Sigun kenni PMaj. Cleff Vencio, hepe ti La Trinidad Municipal Police Station, bin-ig a menor de edad dagiti nakemmeg a drivers dagiti nasao a lugan nga addaan ti peke a placards.
Kinunana a kinumpiskarda ti lisensia dagiti nasao a drivers ken napilaan dagitoy iti nagtutuon a kaso, partikular ti panaglabsing iti ordinansa ti munisipyo maipapan iti community quarantine ken ti panaglabsing iti linteg trapiko.
Imbinglay pay ni Vencio a saan a daytoy ti kaunaan a nakakumpiskarda a peke a plakards gaputa adda metten dagiti nakumpiskarda a peke a food pass sadiay La Trinidad kabayatan ti implementasion ti Enhanced Community Quarantine.
