BAGUIO CITY – Nailukaten iti publiko ti mountain bike (MTB) trail course a masarakan sadiay Barangay Loakan ditoy siudad ti Baguio.
Sigun kenni Mountain Bike Queen ken SEA Games 2-time gold medalist Marites Bitbit, resulta daytoy ti determinasyon ken panagreggetna tapno mapapigsa ti sports wenno ay-ayam a mountain biking ditoy siudad.
Kinunana a saan a nagbalin a lapped ti pandemya nga ituntunda ti COVID-19 iti arapaapna nga ital-o ti mountain biking kas sports.
Dinakamatna a dumanon iti 3.6 nga ektarya ti daga ti agtultuloy a pappapintasenda a mangakomodar kadagiti outdoor sports kas ti obstacle course racing, archery, duathlon event ken dadduma pay.
Iti agdama ket dua a mountain bike course ti mabalinen a pagay-ayaman sadiay dagiti mountain bikers, partikular ti cross country ken downhill a pormal a mailukat inton September 12-13. (report ni Bombo Jordan Tablac)
