BAGUIO CITY – Rinugianen ti Baguio City Health Services Office ti COVID-19 Mobile Vaccination (MoVacc) tapnu mabakunaan dagiti indibidual a saan a makabael nga agturong kadagiti nadutukan a vaccination sites.
Kangrunaan a puntirya ti MoVacc dagiti indibidual a bedridden ken non-ambulatory ditoy siudad.
Naamuan nga iti agdama ket maysa a team ti MoVacc nga agrikrikos iti nagduduma a paset ti siudad para iti nasao a serbisyo medikal.
Maibasar iti rekord, dumanon iti 21 a pasyente manipud kadagiti barangay a saksakupen ti Aurora Hill District Health Center ti nagnumar iti MoVacc ken dagitoy ket nakaawat iti umuna a dose ti bakuna kontra iti COVID-19.
Nainget met a sursuruten ti MoVacc Team dagiti paglintegan kontra iti COVID-19 kas iti panagsuot ti face mask, face shield ken personal protective equipment, physical distancing, disinfection ken limitado nga oras iti panagtalinaedda iti balay dagiti pasyente tapnu maipasigurado ti kinatalged dagitoy ken ti pamilyada manipud iti coronavirus.
Al-allukuyen met ti City Health Services Office dagiti umili ti Baguio nga addaan ti kapamilya a kasapulan a mabakunaan ngem saan a makapan iti vaccination site tapnu irehistroda daytoy iti District Health Center wenno Barangay Health Worker iti barangay dagitoy.
