Mangnamnama dagiti opisyales iti Metro Pacific Tollways Corporation Tour of Luzon iti agtultuloy a panakaipatungpal iti MPTC Tour of Luzon.
Sigun kenni Mr.Patrick Gregorio, Duckworld PH Chairman ken Tour of Luzon 2025 Chief Organizer, naobserbaranda nga adu dagiti Pilipino a mangayat iti cycling sports kabayatan ti naipatungpal nga 8 stage cycling tour.
Gapu iti naobserbaran a kinaadu dagiti Pilipino a nagbuya iti nasao nga aktibidad online ken on-site, napanunotna a nabayagen nga asideg kadagiti Pilipino ti panagbisikleta nu sadino, daytoy ti maysa kadagiti kaunaan nga sports para kadakuada.
Imbinglay pay ti nasao nga opisyal a nangrugidan nga agplano para iti panakaipatungpal ti maysa manen a cycling competition inton sumaruno a tawen.
Innayonna a nanamnama a manayonan dagiti stages iti nasao pasalip ken maaddaan daytoy iti nasaysayaat a rota a dalyasaten dagiti atleta nu sadino, ti latta siudad iti Baguio partikular idiay Camp John Hay ti agbalin a last stage.
Mainaig iti dayta, impanamnama met ni Arrey Perez, Tour Executive Director ken Metro Pacific Tollways Corporation Chief Regulatory Officer nga ad-adu pay ti lugar a maitampok wenno dalyasaten dagiti atleta gapu ta malaksid a maipapan iti sports ti nasao a pasalip ket maysa metlaeng daytoy a paset iti turismo.
Sigun kenni Perez, posible a mainayon ti Region 4A-CALABARZON iti sumaruno nga edisyon iti nasao a pasalip.//Bombo Genzel Depayso
