Agtaltalinaed a nakarikep ti Mount Data Cliff section ti Baguio-Bontoc Road sadiay Monamon Sur, Bauko, Mt. Province kasaruno ti panagtinnag dagiti batbato sadiay idi kalman a nakatayan ti maysa nga indibidual ken nakadangran ti kabsatna.
Iti waragawag ti Department of Public Works and Highways (DPWH) –Mountain Province First District Engineering Office, agtaltalinaed ti kinapeggad ti kasasaad ti nasao a kalsada.
Mabalbalakadan met dagiti motorista a dumalyasatda iti Salin-Balicanao Provincial road wenno Abatan, Buguias-mankayan-Cerbantes-Mt. Province road para iti kinatalgedda.
Maipalagip a pimmusay iti nasao nga insidente idi kalman ti 17-anyos a ni Amanda Loyola Manocay bayat a nadangran ti kabsatna a ni Rafael Loyola Manocay, 16-anyos.
Nakamotorsiklo dagiti biktima idi napasamak ti insidente.
Gapu iti napigsa nga impact ti panakatnag ti bato, narumek ti helmet ni Amanda a nangitunda iti panakadunor ti ulona a rason ti panakatayna.
Agpapaimbag pay laeng met iti ospital ni Rafael gapu iti nasagrapna a dunor iti nagduduma a paset ti bagina.
