BAGUIO CITY–Nakasagana ti lokal a gobierno ti Kalinga ken Mt. Province a pagsaritaan ti isyu ti agtultuloy a tribal war iti nagbaetan ti tribo ti Betwagan ken Bugnay.
Daytoy ket kalpasan a naiyuli ti pakaseknan iti Provincial Boards ti Montanyosa sigun kenni Sadanga Mayor Gabino Ganggangan.
Kinunana a nasken a marisot ti parikut iti nagbaetan ti Betwagan Tribe ti Mt. Province ken ti Bugnay Tribe ti Kalinga kalpasan ti napasamak nga engkwentro dagitoy idi napalbas a nakatayan ti maysa nga indibidwal.
Immunan a dinakamat ti mayor a nabayagen a boundary dispute wenno susik iti nagbeddengan ti saan a pagkinaawatan ti dua a tribo.
Sigun pay iti mayor, naituding koma ti Joint Provincial Session ti dua a probinsiya idi Marso ngem naitantan daytoy inton Agosto 4 gapu iti agdama a pandemya.
Maangay ti nasao a session sadiay Paracelis, Mt. Province.
Maipalagip a rimsua ti engkwentro iti nagbaetan ti Betwagan ken Bugnay Tribe kadagiti kalabbes gapu iti susik dagitoy iti nagbeddengan ti masakupanda a lugar.
