BAGUIO CITY – Nainget ita ti panagbantay ti lokal a gobyerno ti Itogon, Benguet iti Mt. Ulap ken Mt. Ugo a nalatak a hiking destinations sadiay tapnu maliklikan met ti panaka-uram wenno panakadadael dagitoy.
Masarakan ti Mt. Ulap sadiay Barangay Ampucao bayat a masarakan ti Mt. Ugo sadiay Barangay Tinongdan.
Sigun kenni Itogon Mayor Victorio Palangdan, imbilinnan ti nainget a panangipalpalagip dagiti barangay tanods ken dagiti tour guides iti panagbalin a responsable dagiti turista ken trekkers a sumangsang-at kadagiti nasao a bantay.
Kinunana a nauram met ti bassit a paset ti Mt. Ulap idi kanikadua ngem dagus daytoy a sinebseban dagiti tanods ken maseknan nga umili sadiay.
Nainget pay nga ipalpalagip ti mayor ti panangsurot dagiti turista kadagiti nagduduma a pagalagadan iti panagsang-atda iti dua a bantay nangruna ti umno a panagbasura ken ti panagsurot dagitoy iti orihinal a dalan wenno trail agingga iti tapaw dagiti bantay.
