Temporaryo a nairekkep ti tourist destination a Mt. Ulap sadiay Ampucao, Itogon, Benguet gapu iti napasamak a forest fire sadiay Sitio Tapak, Ampucao idi Abril 19 ti agadama a tawen a nang-apektar iti nasao a tourist spot.
Iti panakiuman ti Bombo Radyo kenni Freddy Altiga, kapitan ti Barangay Ampucao, Itogon, Benguet, kinunana a ti napasamak a forest fire sadiay Sitio Tapak ket isu ti maika-uppat a kaso ti uram iti nasao a barangay bayat a maad-adal pay laeng ti rason daytoy.
Sigun kenni Altiga, naideklara ti fire out idi Domingo, Abril 21 ken awan ti nailistada a nadangran ken naapektaran nga indibidual kasta met kadagiti babbalay.
Kadagiti napalpalabas nga insidente ti uram, daytoy ket napasamak iti sitio ti Simpa, Philex, ken Banget.
Kabayatanna, iti panakapasar ti Ampucao ti forest fire, kiddaw ni Altiga kadagiti maseknan ti panangibellengda a kusto kadagiti upos ti sigarilyoda gapu ta mabalin daytoy a mangitunda ti uram, ti saan a panagpoor dagiti residente kadagiti basurada iti asideg ti naango a bubulong ken ti adda a panangkonserba ti publiko iti nabatbati a paset ti kabambantayan iti naso a munisipyo gapu ta daytoy ket mabalin a makaapektar iti suplay ti danum.
Kinuna ni Altiga nga iti nakaro a bara ti panawen ket agbalbalin met a pakaseknan ti suplay ti danum nangruna kadagiti residente nga adda iti nangato nga elevation.
Pati dagiti mannalon ket agbalbalin a karit kadagitoy ti pag-alaanda ti pagsiboda kadagiti mulada.//M
