Naituding nga agsapata kas baro a Prime Minister ni Muhammad Yunus iti pagilian a Bangladesh kalpasan ti panaglusolus ni Sheikh Hasina kas Prime minister gapu iti makalawas a panakaipatungpal ti panagprotesta a nangitunda iti ipupusay ken panakdangran ti ado a tattao.
Ni Yunus, 84-anyos ket nagsubi iti pagilian a Bangladesh idi kalman ken daytoy ti agbalin a dadaulo ti baro nga interim government kas kiddaw dagiti estudyante.
Agap-apela met ni Yunus iti publiko nga agbalin dagitoy a kalmado ken liklikanda ti anyaman a kita ti kinaranggas.
Kabayatanna, impeksa ni President Mohammed Shahabuddin a kasapulan a mapinal ti interim government tapno masolbar ti crisis a mapaspasamak.
Mangnamnama met ni Army chief General Waker-Uz-Zaman a ti baro nga interim government ket agsapata a dagus tapno sumayaat ti kasasaad ti pagilian iti las-od ti tallo agingga upat nga aldaw.
Kinuna pay ni Army chief General Waker-Uz-Zaman a nakipagsaritadan kadagiti student liders, political parties ken iti presidente a kumpiyansa dagitoy a kabaelan ni Yunus nga idauloan ti nasao a pagilian babaen iti demokratiko a proseso.
