BAGUIO CITY – Nailatangan iti P210-M ti maipasdek a multi-level parking building sadiay Camp Allen, Baguio City partikular iti asideg ti opisina ti Bureau of Fire Protection -Baguio.
Sigun kenni City Budget Officer Leticia Clemente, puntiryada a marugian ti konstruksion ti nasao a parking building inton sumaruno a tawen.
Kinunana a dumanon iti P117-M ti manamnama nga agtaud manipud iti makolektar a real property taxes ditoy siudad.
Gapu iti daytoy, tarigagayda a maaprobaranen ti singasing nga ordinansa a mangisaksakd ti panakaipangato iti buis dagiti real properties gaputa dakkel a makatulong daytoy iti nasao a proyekto.
Kinunana nga iti kanito a saan a maaprobaran ti singasing nga ordinansa ket agsapolda iti dadduma a wagas a pagtaudan ti pondo para iti nasao a proyekto.
Innayonna pay a no awan iti mabalin a pagtaudan ti pondo ket posible a maitantan ti mapangpanggep a proyekto a multi-level parking ti siudad.
