Balligi a naipatungpal ti Multilateral Maritime Cooperative Activity ti nagbaetan dagiti navy troops iti Pilipinas, Estados Unidos, ken Japan idi laeng Biernes, September 12.
Daytoy ket iti baet ti presensya dagiti tallo a People’s Liberation Army Navy (PLAN) vessels iti China a naobserbaran a naulimek a mangmonmonitor iti maang-angay nga aktibidad.
Nupay kasta, inlawlawag ti maysa a kameng iti BRP Jose Rizal nga awan iti panangburibor wenno interference a napasamak.
Maysa nga highlight iti nasao nga aktibidad ti flyby dagiti fighter jets iti Philippine Air Force a naidisenyo tapno ipakita ti military readiness iti Philippine military para iti panangsalaknibna iti masakupanna iti tangatang ken iti ta-aw.
Malaksid iti dayta, maysa pay a napateg a paset ti aktibidad ti cross-deck landing operation iti Philippine Navy helicopter a nagdisso iti missile destroyer a USS John Finn manipod Estados Unidos ken iti Landing Ship Tank a JS Osumi manipod met iti Japan.
