BAGUIO CITY – Manamnama a malpas iti ngudo ti Nobyembre wenno iti umuna a lawas ti Disyembre ti maipatpatakder a municipal quarantine ti Tublay, Benguet.
Iti panakiyuman ti Bombo Radyo Baguio kenni Mayor Armando Lauro, kinunana a 60 calendar days ti naipaay kadakuada tapnu maipatakder ti nasao a pasilidad a masarakan sadiay Barangay Ambungdolan.
Naponduan ti proyekto iti P8.2-M babaen iti nasyonal a gobyerno a naidalan iti Department of Public Works and Highways babaen iti tulong ni Benguet Caretaker Congressman Eric Go Yap.
Mailukat ti pasilidad kadagiti umili ti munisipyo, nangruna kadagiti umili ti Barangay Ambungdolan.
Dinakamat ni Mayor Lauro a napilida a maibangon ti pasilidad iti nasao a barangay gapu iti kaadu dagiti residente sadiay.
Innayonna a mabalin pay a maaramat ti pasilidad kas temporaryo nga evacuation center iti panawen ti kalamidad wenno emerhensia ken kas mabayadan a lodging area dagiti turtista.
