BAGUIO CITY| Agsagsaganan ita ti Munisipyo ti La Trinidad Benguet, para iti umadani a Strawberry Festival inton bulan ti Marso.
Ti panakaiyuman ti Bombo Radyo , kinuna ni Municipal Councilor Teddy Walang, mangrugrugin itan ti panagplano ti konseho para ti nasao a festibidad.
Mainaig iti dayta, maysa kadagiti manamnama a highlights ti selebrasyon ket ti “Strawberry Cake Baking” ken ti float parade.
Impalagip ni Councilor Walang, a ti nasao a festival ket maramarambakanen manipud pay idi tawen 1980’s.
Innayonna, a panggep daytoy a mangitandudo ti One Town One Product (OTOP) ti munisipyo tapno makatulong kadagiti babassit a negosyante tapno iti kasta ket makabawida iti pannakalugida idi pandemya.
Kabayatanna, manarimaan met ti koordinasyon ti Local Government Unit (LGU) kadagiti nagduduma nga organisasyon tapno masaganaan nga usto iti umadani a festival.
Maipalagip a nakanselar idi tawen 2020 ken 2021 ti Strawberry Festival idi napalabas a tawen, nagsubli daytoy idi 2022 ngem limitado laeng dagiti aktibidad./RKBantiding
