BAGUIO CITY – Mangiwaras ti Muslim Community iti libre a face mask ken alcohol ditoy siudad ti Baguio inton Pebrero 7 aldaw ti Biernes kagiddan ti pangta ti coronavirus.
Sigun ken ni Atty. Yasser Guru, dadaulo ti National Commission on Muslim Filipinos ditoy siudad Baguio City, maiwaras dagiti libre a facemask iti sangapulo a moske ditoy siudad.
Kinunana a kalpasan kadagiti moske ket mangiwarasda met laeng iti facemask sadiay Session Road.
Malaksid iti facemask ket mangipaay pay ti Muslim Community iti libre nga alcohol kadagiti umili.
Dinakamatna a sadiay Metro Manila ti naggatanganda iti facemask gapu ta awanen ti magatang a facemask ditoy siudad.
Kagiddan iti daytoy ket kidkiddawen ni Guru ti pannakikaykaysa dagiti umili kadagiti otoridad tapno maliklikan ti nasao a virus.
