BAGUIO CITY – Agtaltalinaed a COVID-free ti Muslim Community ditoy Baguio City iti baet ti agtultuloy a panakailista iti kaso ti nasao a sakit ditoy lokalidad.
Iti panakiyuman ti Bombo Radyo Baguio kenni Atty.Yasser Guru, dadaulo iti National Commision on Muslim Filipinos ditoy Baguio, kinunana a saanen a nanayunan pay ti maysa a miembro dagitoy a maatap a nakaptan ti COVID-19 itay laeng nabiit.
Sigun kenkuana, nainget latta nga agtungtungpalda kadagiti health protocols kadagiti amin nga aktibidad nga isaysayangkat ti grupoda tapnu maipanamnama ti kinatalged ti salun-at dagitoy kontra iti agraraira a sakit.
Impanakkelna met ti panagtalinaeda a peace-loving community gaputa agingga ita ket awan paylaeng ti krimen a nailista dagiti otoridad nga adda pakainaigan dagiti Muslim.
