BAGUIO CITY – Awan ti maipatungpal a muzzle tapping iti igam wenno paltog dagiti personnel ti Philippine National Police kagiddan ti pannakarambak ti Paskua ditoy pagilian.
Sigun kenni PCI Carol Lacuata, panakangiwat ti Cordillera PNP, nailanad daytoy iti pammilin nga impaulog ti PNP national headquarter.
Kinunana nga awan ti maipatungpal a muzzle tappling iti igam dagiti pulis nangruna ta bimmaba ti kaso ti indiscriminate firing ditoy pagilian gapu paylaeng iti kooperasyon dagiti pulis ken ti publiko.
Sigun kenkuana, iti nainget a liderato ti PNP ket patienda nga agbalin a responsable dagiti miyembro ti pulisya iti panagaramat dagitoy iti igamda tapno maliklikan ti pannakairamanda iti indiscriminate firing a posible a pakasuspindiranda wenno pakaikkatanda iti serbisyo.
Dinakamatna nga iti rehion Cordillera ket nakailistada iti lima a kaso ti indiscriminate firing idi napalabas a tawen, partikular sadiay Kalinga a nakailistaan ti tallo a kaso bayat a saggaysa iti Atok, Benget ken ditoy siudad ti Baguio.
Innayonna a dagiti suspek iti nasao a panagpaputok iti paltog ket retirado a pulis, soldado, sibilyan ken saan pay a nabigbig nga indibidual.
